மின்மினி தேசம் : பாகம் 1

எல்லைகள் அற்ற இந்தப் பிரபஞ்சத்தின் மூலைமுடுக்கெங்கும் கணப்பொழுதில் சென்றடையக் கூடிய உங்கள் கற்பனைக் குதிரையில் ஏறி என்னோடு சிறிது பயணியுங்கள். நீங்கள் என்றும் கண்டிராத ஒரு அற்புத உலகிற்கு உங்களை அழைத்துச் செல்கின்றேன்.

“நாங்கள் இன்னும் 480 வினாடிகளில் சூரிய ஈர்ப்புக்கு அப்பால் சென்றுவிடுவோம். இந்த செய்தி மடலுடன் எமக்கும் உங்களுக்குமான இருவழித் தொடர்பு முற்றாக விலகுகின்றது. இன்னும் சரியாக 60 வினாடிகளில் நாங்கள் ஒளியின் வேகத்தினை அடைந்து விடுவோம். எமது இந்தப் பயணத்தின் குறிக்கொள் வெற்றி பெற இறைவனைப் பிரார்த்தியுங்கள். – இப்படிக்கு மஞ்சரி. ” என்ற குறுஞ் செய்திமடலினை மின்காந்தப் பொட்டலங்களாக்கி பூமிக்கு மேலே சஞ்சரித்துக் கொண்டிருக்கும் சர்வதேச விண்வெளி ஓடத்திற்கு அனுப்பிவிட்டு நிமிர்ந்தாள் பீனிக்ஸ் விண்வெளி ஓடத்தின் துணைக் கப்டன் மஞ்சரி.

ஆட்டிபிஷல் இன்ரெல்யன்ஸ் என்னும் செயற்கைப் புத்திசாலித்தனத்தை முழுமையாகப் பயன்படுத்தி எந்தவிதமான மனிதக் கட்டுப்பாடுகளும் இல்லாமல் தானாகச் சிந்தித்து செயற்படக்கூடிய இந்த பீனிக்ஸ் பிரபஞ்ச வெளியில் பரந்திருக்கும் கொஸ்மிக் மின்காந்தக் கதிர்களை அகத்துறிஞ்சி, அந்த மின்காந்தப் பொட்டலங்களைப் பகுப்பதன் மூலம் சக்தியைப் பெற்று இயங்கும் சிறந்த விண்வெளியோடம். இந்த பீனிக்ஸின் புறமேற்பரப்பு எத்தகைய அதிர்வுகளையும் பாரதுரமான மோதுகைகளையும் தாங்குவதற்கு ஏற்ற வகையில் நனோ ரெக்னோலயி முலமாக மூலக்கூறுகள் சேர்க்கப்பட்ட கவசப் பாதுகாப்பு. இத்தகைய பல சிறப்புக்களைக் கொண்ட பீனிக்ஸ்ன் துணைக் கப்டன் மஞ்சரி அவளின் எதிரில் இருந்த ஐந்து மீற்றர் நீளமான அகலக் கணணித்திரையில் பீனிக்ஸ்ன் வேகமாற்றத்தினை பார்த்து இரசித்துக் கொண்டிருந்தாள்.

மஞ்சரி பெயருக்கு ஏற்றாற் போல் அழகும் திறமையும் பூங்கொத்தைப் போல என்றும் குலையாத பொலிவுடன் திகழும் இருபத்தைந்து வயது நங்கை. அவளைக் கடந்து செல்பவர்கள் யாராக இருந்தாலும் ஒருகணம் அனிச்சையாக திருப்பி பார்க்க வைக்கும் அழகு. அப்படியொரு அழகு தேவதை. சிரிக்கும் போது சின்னதாக எட்டிப் பார்க்கும் அந்த சின்ன தெத்திப்பல் அழகின் உச்சம். அவளது புத்திசாலித்தனத்தை விபரிக்கவே தேவையில்லை. எவ்வாறான சிக்கலான சூழ்நிலையிலும் தீர்க்கமாகவும் துரிமாகவும் செயலாற்றக் கூடிய அந்தப் பெண் இப்போது செக்கனுக்கு 3*10^8 மீற்றர்கள் என்ற ஒளியின்
வேகத்தில் இந்தப் பிரபஞ்சத்தின் இதுவரை மனித சுவடே பதிந்திராத இடத்தை நோக்கி தனது நண்பர்களுடன் பீனிக்ஸ் இல் பயணித்துக் கொண்டிருந்தாள்.

பீனிக்ஸின் இயக்கக் கட்டுப்பாட்டுப் பகுதியில் உள்ள ஐந்து மீற்றர் நீளமான அகலக் கணணித்திரையில் பரந்து விரிந்து கிடக்கும் பிரபஞ்சத்தின் அழகிய தோற்றத்தையும், அந்தக் கணணித்திரையின் வலது மேல் மூலையில் பீனிக்ஸின் வேகமாற்ற வரையையும் இரசித்தபடி இருந்த மஞ்சரியை “விசேட கலந்துரையாடலுக்காக அனைவரையும் கலந்துரையாடல் அறைக்கு வரவும்” என்ற ஆதித்யனின் குரல் அவளைச் சுயத்திற்குத் திருப்பியது. தனது நாளாந்த செயற்பாட்டுக் குறிப்பேட்டை எடுத்துக் கொண்டு கலந்துரையாடல் அறைக்கு விரைந்தாள் அந்த நங்கை.

ஓர் நீள்வட்ட மேசையிம் அதில் ஆறுபேர் வசதியா அமர்வதற்கு உரிய இருக்கைகளும் கொடுகைக்கு துலங்கக்கூடிய ஆறு மடிக் கணணிகளும் அந்த மடிப்புக் கணணிகளில் இருந்து இயங்க வைக்கப் படக்கூடியதான ஓர் அகலமான திரையையும் கொண்டிருந்தது அந்தக் கலந்துரையாடல் அறை.

அவ் அறைக்கு மஞ்சரி வரும் போது பீனிக்ஸின் இல் அவளுடன் இணைந்து செயற்படும் ஏனைய ஐவரும் அங்கே பிரசன்னாமாகி இருந்தனர். அவர்களை நோக்குத் தன் வசீகரக் கண்களால் சிறு புன்னகை ஒன்றை வீசிவிட்டு தனது இருக்கையில் வந்து அமர்ந்து கொண்டாள் மஞ்சரி.

பூமியில் இருந்து பல்லாயிரும் கோடி மைல்களுக்கு அப்பால் உள்ள புளூட்டோவின் சுற்றுப்பாதையையும் விலக்கி ஒளியின் வேகத்தில் சூரியனின் ஈர்ப்பில் இருந்து முற்றாக விடுபட்டு பிரபஞ்சத்தின் இன்றோர் மூலையை நோக்கி சீறிப்பாய்ந்து கொண்டிருந்த பீனிக்ஸின் கலந்துரையாடல் அறையில் இளம் விஞ்ஞானிகளான ஆதித்தன், மஞ்சரி, பானு, இராகவன் மற்றும் ரோகினி ஆகியோர் அங்கே தமது நோக்கம் பற்றிய கலந்துரையாடலில்…

தொடரும்….

சின்னதா ஒரு தொடர் கதை ஒன்று எழுதுவோம் எனத் தொடங்கி இதுவரை கொண்டு வந்து விட்டேன்.. சுதப்பலாயில்லாட்டி சொல்லுங்கள். விஞ்ஞான சாகசக் கதைகளில் எனக்குள்ள ஈடுபாட்டால் இந்தக் கதையினை எழுதத் தொடங்கியுள்ளேன். விரைவில் மிகுதிப் பாகம் பதியப்படும்.

Categories: கதை

21 comments