மாபாரதத்தை நிறுத்த வழி

இந்த வரிகள் மகாபாரதத்தில் மிகவும் பிரபல்யமானவை. மகாபாரத யுத்தம் மூழ்வதற்கு முன்னர் கார்மேக கண்ணன் ஜோதிடக் கலையில் சிறந்து விளங்கிய சகாதேவனை நோக்கி வரப்போகின்ற பாரத யுத்தம் நிகழாமல் தடுக்க என்ன செய்ய வேண்டும் எனக் கேட்ட போது சகாதேவன் கூறிய வரிகளே அவை.

கர்ணன் நாடாள வேண்டும். அவனை எப்பொழுதும் இகழ்ந்து பேசிக்கொண்டிருக்கும் அர்ச்சுனனைக் கொல்ல வேண்டும். சூதாட்ட நிகழ்வின் போது பலபேர் முன்னிலையில் தன் தலைமுடியை அவிழ்த்து விட்டு சபதம் செய்த திரொபதியின் தலைமுடியை வெட்டி மொட்டையடித்து சிறை வைக்க வேண்டும். அத்துடன் இவ்வளவிற்கும் காரணமான உன்னை – கண்ணனையும் பிடித்துக் கட்டி வைப்பேனேயானால் தடுத்து விடலாம் மகாபாரத யுத்தத்தை எனக் கண்ணனிடம் சகாதேவன் கூறுகின்றான். எல்லாம் தெரிந்த எல்லாவற்றையும் மறைமுகமாக நடாத்திக் கொண்டிருந்த கண்ணன் மெல்ல நகைத்து விட்டு சகாதேவனிடம் மீண்டும் இதுவெல்லாம் நடப்பது சாத்தியமா எனக் கேட்டுச் சிரிக்கின்றான்.

ஆனால் அன்று நடந்து முடிந்த அந்த மகாபாரத்தின் இந்த உரையாடலுக்கும் இன்று ஈழத்தில் நடந்துகொண்டிருக்கும் நான்காம் கட்ட ஈழ யுத்ததின் பின்புலத்தில் நிகழ்கின்ற நிகழ்வுகளுக்கும் நிறையவே ஒற்றுமை உண்டு. அந்த மகாபாரதம் என்னவோ இந்திய மண்ணில் நடந்தது. அதில் இறுதியில் தர்மம் தான் ஜெயித்தது. ஆனால் இன்றோ…

இன்று நடந்து கொண்டிருக்கும் யுத்தம் முடிவுக்கு வரவேண்டுமானால் மேற்சொன்ன சகாதேவனின் வார்த்தைகள் தான் இங்கே நிஜமாகவேண்டும். நிகழ்காலத்தில் நடந்துகொண்டிருக்கும் இதற்கான முக்கியமான காரணிகளை என்னால் விளக்கமாக விபரிக்க முடியாது. அது இப்பதிவு எழுதிய என்னைப் பாதிக்கும் என்பது சொல்லி விளங்கவைக்க வேண்டிய அவசியம் இருக்காது. ஆனாலும் ஒரு பாத்திரத்தை மட்டும் இங்கே ஒப்பிட முடியும். அன்று பாஞ்சாலிக்கு என்ன தண்டனை கொடுக்க வேண்டும் என்று சகாதேவன் கூறினானோ அத்தண்டனையை இன்று நடக்கும் யுத்தத்தை நிறுத்த அந்த இத்தாலிப் பெண்மணிக்குக் கொடுக்க வேண்டும்.

யாரை நாடாள வைக்க வேண்டும், யாரைப் பிடித்துக் கட்ட வேண்டும் என்பதனைப் பற்றிய விளக்கங்களையேல்லாம் உங்களின் யூகத்திற்கே விட்டு விடுகின்றேன்.. 🙂

Categories: அரசியல், எனது பார்வையில், வன்னி

4 comments