தமிழில் வாழ்த்துக்களைப் பரிமாறுங்களேன்

சில விடையங்கள் எப்போதும் அழகாக, மனதிற்கு இதமாக அமைந்து விடுகின்றன. தீபாவளிக்கு புது உடுப்பு உடுத்தி, கோவிலுக்கு சென்றுவிட்டு பின் உறவினர் வீடுகளுக்கும் சென்று அவர்களுடன் மகிழ்ச்சியாக சிறிது வேலைப்பழு மற்றும் புறெஜக்ட் வேலைகளை மறந்து உரையாடுவது ஒருவித சந்தோசம்தான்… மனிதன் இத்தகைய கொண்டாட்டங்களைக் கண்டுபிடித்ததே இதற்காகத்தானெ.. மனதிற்குப் பிடித்தவர்களை வாழ்த்துவதும் அவர்களிடம் இருந்து வாழ்த்துக்களைப் பெறுவதும் மனதில் இன்பப் பெருக்கை ஊற்றெடுக்கச் செய்யும் அம்சங்கள்.

இன்று காலை கண்விழித்ததே எனது கைத்தொலைபேயின் சிணுங்கலைக் கேட்டுத்தான். தித்திக்கும் தீபாவளியில் காலைக்கதிரவன் உதிக்கும் முன்பே என்னை எழுப்பி தீபாவளி வாழ்த்துக்களைப் பரிமாறியிருந்தான் என் உயிர் நண்பன் ஒருவன். காலை நேரத்தில் எஸ்.எம்.எஸ் வாழ்த்து வருவது இயல்புதான். ஆனால் அவனது வாழ்த்துச் செய்தி வெறும் உதட்டளவிலான வாழ்தாக இல்லாமல் மனம் நிறைந்த அன்புடன் அனுப்பியிருந்தான். உண்மைதானே வாழ்த்துக்களைப் பரிமாறுவதில் வெறும் உதட்டளவு வார்த்தைகளை மட்டும் பயன்படுத்தாது எமது காத்திரமான அன்பையும் கலந்து குழைத்து பரிமாறினால் மற்றவர்களின் உள்ளத்தினை இலகுவாக வெல்லமுடியும்தானே.

மேலும் அவன் துாய தமிழில் ஆங்கிலக் கலப்பின்றி வாழ்த்துச் செய்தியை அமைத்திருந்தான். தமிழின் சிறப்பே இதுதானே. இதனால்தானே பாரதி சொன்னான் யாமறிந்த மொழிகளிலே தமிழ் மொழிபோல் இனிதாவது எங்கும் காணோம் என்று. சற்று எண்ணிப் பாருங்கள் எம்மில் எத்தனை பேர் இன்று ஆங்கிலக் கலப்பின்றி தனித் தமிழில் வாழ்த்துக்களைப் பரிமாறினோம் என்று!…

ஆங்கிலக் கலப்பின்றி துாய தமிழில் வாழ்த்துக்களைப் பரிமாறிப் பாருங்கள், அதன் பின் நீங்களே உணர்வீர்கள் தமிழின் சிறப்பை… தமிழனே தமிழைப் பயன்படுத்தாவிட்டால் வேறுயார் தமிழைப் பயன்படுத்தப் போகிறார்கள்…