வந்தாள் என் தேவதையே

அலுவலகத்தில் நீண்ட வேலைக் களைப்பில் நள்ளிரவு தாண்டிய நேற்றைய இரவில் மெல்லக் காலாற மனதிற்கு இதமாக வெற்றி FM மை மெல்லிய தொனியில் iPod இனை காதுகளுக்கருகில் நீட்டப்பட்ட headset என்னும் தொடுப்பின் ஊடாக மெல்ல இசைக்க விட்டபடி காலி வீதியில் நடந்து வந்து கொண்டிருந்தேன். நள்ளிரவில் தூறிச் சென்ற மழையின் பின் இதமாக வீசிக் கொண்டிருந்த மெல்லிய காற்று முகத்தில் படும்போதெல்லாம் எனக்குள் சிலுசிலிர்க்க வைத்தன என் நரம்பு மண்டலங்கள். என்னை நான் மறந்து, கால்கள் வீடு நோக்கி மெல்ல நடை போட்டுக் கொண்டு இருந்த அந்தத் தருணத்தில் என் கண்ணெதிரே..

கால்களில் தங்க கொலுசு கலகலக்க, மின்னலில் வடம்பிடித்த கயிறென சேலைத் தலைப்பு படபடக்க, அதில் தொங்கவிட்டிருந்த மணி அலங்கார வேலைப்பாடுகள் சலசலக்க கண்களில் காந்தப் பார்வைகள் கவர்ந்திழுக்க கைதனில் அகல் விளக்கொன்னை ஏந்தியபடி பாதம் பூமிதனில் பதியாது காற்றில் மிதந்து வந்தாள் நங்கையொருத்தி.. இல்லை இல்லை தேவதை ஒருத்தி.. சொக்க வைக்கும் சொரூபம்.. உண்மையில் சொக்கிப்போய் என் கால்கள் நடை தளர்ந்தன. அந்த அகல்விளக்கைச் சுற்றி மின்னிக்கொண்டிருந்த விட்டில்களும் அவள் பின்னால் பஞ்சென இருந்த இரு இறக்கைகளும் அந்த நிசப்ப வேளையில் என் மனதில் பயம் கொள்ள வைத்தன. யாரவள் என் வீட்டுக்கருகில்? பெரிதாகக் கத்தவேண்டும்போல் இருந்தது.. தொண்டைக்குழி வரை வந்த சப்தம் அந்த இடத்தை விட்டு நகராது தொண்டைக் குழியிலேயெ சிக்கிக்கொண்டது. அவளோ என்னை மிகவும் நெருங்கி விட்டாள். இருவருக்கும் இடையில் மூச்சுக்காற்றுகள் பரிமாறும் தூரம்தான்.. என் சப்த நாடியும் ஒடுங்கியது..

சுபானு.. தேவதை ஒருதியின் குரலில் வந்தது மோகனமா ஹிந்தோளமா? பதிலாக என்னிடம் இருந்து மொனம் நிண்டது. மிண்டும் “என்ன சுபானு சுயத்திற்கு வாங்க..” நிச்சமாக ஒலித்தது ஹிந்தோளமே தான்.. யார் நீங்க? தொண்டைக்குழியில் சிக்கியிருந்த சில்லு உடைபட மெல்ல உருண்டோடும் குடத்தின் கலகலத்த ஓசையென வந்து என்குரல்..

சந்துரு என்னை ஊஞ்சலாட அனுப்பி எத்தனை நாட்களாச்சு தெரியாத உங்களுக்கு, என்னை விட வேலை தானா முக்கியம் என கனிவாக மிரட்டியது தேவதை.. அடடா.. என் விருப்பங்களை நிறைவேற்றி வைக்க வந்த தேவதையா இது.. நன்றி சந்துரு.. இப்படித்தான் தேவதை இருப்பாள் எனத் தெரிந்திருந்தால் அவளைக் காண அன்றே வந்திருப்பேனே.. காலத்தை சற்று நகர்த்தி விட்டேனே.. எனக்குள் கோபங்கள் என்மேலேயே..

என்ன மீண்டும் கற்பனையா.. ஹிந்தோளம் கணீர் என ஒலித்தது. இல்லை… நட்டநடு இராத்திரியில் வந்து இப்படி என் முன்னால் நின்றால் என்ன பேச முடியும்..? நீங்க இஸ்டப்படும் பத்து விருப்பங்ளை சொல்லுங்க நான் நிறைவேற்றி வைக்கின்றேன் என்றாள் அந்த தேவதை.. நிறையக் கேட்க வேண்டும்.. எல்லோரைப் போலவும் பணக்காரணாக மிக்க மகிழ்ச்சியோடு வாழ வேண்டும்.. நிறையக் காசு வேண்டும் எனக் கேட்போமா..? வேண்டாம் என்னால் பணத்தை உழைக்க முடியும்.. ஒரு வரத்தை வீணாக்க வேண்டாமே.. என் பல கனவாவே இருக்கின்ற ஆசைகளில் சிலவற்றைக் கேட்போமே என எனது சில விருப்பங்களைப் பட்டியலிட்டேன்..

1. நான் சின்ன வயதில் அனுபவித்த ஷெல் வீச்சுக்களும் பயந்து ஒடுங்கிப் போன விமானக் குண்டு வீச்சுக்களும் இனி இந்த உலகில் பிறக்கும் எந்தக் குழந்தையும் அனுபவிக்கக் கூடாது.. எனது தலை முறையோடே நாம் பட்ட வேதனைகள் அனைத்தும் நீங்கி சந்தோசம் மிக்க வாழ்க்கையை எமது எதிர்காலச் சமுதாயம் அனுபவிக்கட்டும் என வரங்குடு என் தேவதையே..

2. பாட்டன் முப்பாட்டன் எனப் பரம்பரை பரம்பரையாக இந்த மண்ணில் வாழ்ந்து தமது சந்தோசம் துக்கம் என எல்லாத்தையும் இங்கேயே கழித்த மக்களின் முதுகெலும்பை உடைத்தது போன்று திறந்த வெளிச்சிறைதனில் அடைக்கப்பட்டு ஒடுக்கப்ட்டுள்ளார்களே அவர்களின் அபிலாசைகள் பூர்த்திசெய்யத்தக்க நியாயமான ஆசைகளை நிறைவு செய்யக்கூடிய வாழ்க்கையை திரும்பவும் கிடைப்பதற்கு வரமளி என் தேவதையே..

4. என்தன் தாய்மொழி தமிழ் உலகெங்கும் மிக சிறந்த மொழியாகி பட்டிகொட்டி என எங்கும் பரவி தமிழ் மணம் எங்கும் பரவ நீ வரமளி என் தேவதையே..

4. காலங்கள் எவ்வளவு தான் கடந்திருந்தாலும், இன்றைக்கு ஆயிரம் ஆண்டுகளுக்கு முன்னர் நிலவிய அந்த சோழ சாம்ராச்சியத்தில் நடந்த நிகழ்வுகளை நினைப்பது எம் அனைவருக்கும் கற்பனையில் மட்டும் கிடைக்கின்ற தனிசுகம். அந்தக் காலத்திற்கு கூட்டிச்செல்ல வேண்டும்.. குடத்தைக்குச் செல்ல வேண்டும். நந்தினியின் அழகை இரசிச்க வேண்டும். எனக்கு மிகவும் பிடித்த அந்த ஆதித்தயனோடு ஒன்றாகக் குதிரைச் சவாரி செய்ய வேண்டும்.. குந்தவையோடு அளவளாவிட வேண்டும். இதெல்லாம் நீ நடத்தித் தர வேண்டும் என் தேவதையே..

6. இந்தப் பூமி தவி்ர்ந்த வேறு எங்கெல்லாம் உயிரினங்கள் வாழ்கின்றன..? என்னை இந்தப் பிரபஞ்சம் முழுதும் சுற்றிப்பாக்கவல்ல விண்கலத்தில் என்னை சுற்றிப் பார்க்கக் கூட்டிச் செல் என் தேவதையே.. பிரபஞ்சம் முழுதும் பறக்க வேண்டும்.

7. வெற்றியோ தோல்வியோ, கவலையோ சந்தோசமோ எப்போதும் நிலைமாறாத மனநிலையை நான் பெற நீ வரமளிக்க வேண்டும் என் தேவதையே..

8. என் பள்ளி காலம் எனக்கு இன்னும் ஒரு முறை வேண்டும் என் தேவதையே.. : கஸ்தூரியார் வீதி Bus-halt இல் நாள் தோறும் நான் இந்துக் கல்லூரிக்குச் செல்லும் போது அங்கே ஒரு நங்கை வேம்படிப் பாடசாலைக்குச் செல்லதற்காக காத்திருக்கும் பொழுதுகளில் : காணும் போதெல்லாம் எப்போதும் நம் இரண்டு சோடிக் கண்கள் வீசும் அந்த முறைப்புப் பார்வைகளின் வீச்சு : நான் இரசித்த அந்த நாட்கள் : அந்த “பிரியங்க”மான தோழியுடன் மீண்டும் மீண்டும் எமது இரண்டு ஜோடிக்கண்களில் முறைப்புக்கள் : அந்த நாட்கள் எனக்கு வேண்டும் என் தேவதையே..

9. நாள் தோறும் கேட்டு மகிழும் வெற்றியின் விடியல் நிகழ்ச்சியினை லோசன் அண்ணாவுடன் சேர்ந்து ஒருநாளுக்கு நானும் ஒலிபரப்புச்செய்து லோசன் அண்ணாவினை விட நான்றாக சுபானு தொகுத்து வழங்குவான் என பெயர் பெறவேண்டும் என்ற எனது நீண்ட நாள் ஆசை நிறைவேற வரமளி என் தேவதையே..

10. நான் காதலிக்கும் சங்கீதத்தை எனக்கு எப்போதும் தடங்களின்றிக் கிடைக்கவும் மாசறாது நான் எப்போதும் காதலித்துக் கொண்டே இருப்பதற்கும் எனக்கு வரமளி என்தேவதையே..

என அந்தக் கணத்தில் மனதில் தோன்றிய பத்து விருப்பங்களை அந்த தேவதையிடம் தெரிவித்தேன். புன்னகைத்து மீண்டும் ஹிந்தோளம் அந்த வீதிகளில் பரவியது. ஆம்.. புன்னதைத்து, உன்விருப்பம் நிறைவேற என் மனமார்ந்த வாழ்த்துக்கள் என்றும் உன்னோடு என் கண்சிரித்தது அந்தத் தேவதை.. சரி நான் உனக்கு வரமளித்தேன் நீ பதிலுக்கு என்னை ஊஞ்சலாட்டுவாய? நி்ட்சயமாக நாளை என் ஊஞ்சலுக்கு வாயேன் என்றேன்.. ம்.. வேறு எங்கெல்லாம் நான் சென்று ஆசைளை நிறைவேற்ற வேண்டும் எனச் சொல்லடா எனச்சிரித்தது என் தேவதை..

TalkOut in Tamil நிமல்

SShathiesh சதீஸ்

மருதமூரான் மருதமூரான்

டயானா ‘அறிந்ததும் அனுபவமும்’ டயானா

இந்த நண்பர்களுக்கும் நான் பெற்ற இன்ப அனுபவத்தை பெற வழிசெய் என் தேவதையை என்றேன்.. அப்போ இப்போது உன்னிடம் இருந்து விடைபெறுகின்றேன்.. மீண்டும் காலம் கனியும் போது சந்திப்போம் என்று விடைபெறும் போது என் காதுகள் மீண்டும் ஹிந்தோளத்தை இரசித்தன, கண்கள் அவளின் அழகையும் தான்.

Categories: எனது பார்வையில், குறும்புகள், ச்சீசி

23 comments